Blog

Shirkan oo seddexdii bil mar la qabto ayaa waxaa soo qaban qaabiyo wasaaradda Gargaarka iyo Maareynta Musiibooyinka Dowladda Federaalka Soomaaliya. Si looga hadlo Xaaladda Bani’aadanimo ee Dalka iyo la socoshada iyo sixida hanaanka bixinta gargaarka bani’aadanimo.

Shirka waxaa ka soo qeyb galay Madax kala duwan oo ka kala socotay Dowladda Federaalka Soomaaliya, Maamul goboleedyada Dalka, madaxda hay’adaha qaramada midoobey, Hay’adaha caalamiga ah, kuwa aan dowliga ahayn, deeq bixiyeyaasha iyo shirkadaha gaarka loo leeyahay.

Shirka oo socday maalin badhkeed ayaa lagu lafa guray 2 arimood oo aaad muhiim ugu ah gargaarka kuwaan oo ah:

Daadajinta gargaarka heer Federaal, gobol, Degmo ilaa heer tuulo.

Iyo sixida wada shaqeynta Dhamaan dhinacyada ka shaqeeya gargaarka.

Gabagabadi shirka ayaa waxaa la isku raacay war-murtiyeedka hoos ku qoran:

In la xoojiyo wada shaqeynta iyo xog wadaagga Wasaaradda Gargaarka iyo Maareynta Musiibooyinka heer Federal iyo Wasaaradaha/Hay’adaha Gargaarka iyo Maareynta Musiibooyinka ee heer Dowlad Gobaleed.

In laga wada shaqeeyo sidii hoos loogu daadejin lahaa arimaha gargaarka iyadoo la gaarsiinayo heer tuulo si loo dhiso awooda u adkeysiga iyo dhaqso ka jawaabida musiibooyinka dadka heer gobol, heer degmo ilaa heer tuulo.

In la joogteeyo kulamada iyo shirarka si ay taas u noqoto fursadd Aqoon-Wadaag iyo iskaashi Wasaaradda Gargaarka iyo Maareynta Musiibooyinka heer Federal iyo Wasaaradaha/hey’adaha Gargaarka iyo Maareynta Musiibooyinka ee heer Dowlad Gobaleed.

Madasha waxay cadeynaysaa in Wasaaradda Gargaarka iyo Maareynta Musiibooyinka Dowlada Federaalka Soomaaliya ay tahay albaabka ugu horeeya ee laga soo galayo wax kasta oo la xidhiidha gargaarka arrimaha bani’aadaminimada iyo maareynta musiibooyinka.

Madashu waxay ka codsatay deeq bixiyeyaasha in ay taageeraan “qorshaha 2019 ee ka jawaabida Saameynta Abaaraha” kaasoo ay si wada jir ah u soo bandhigeen MoHADM-Somalia iyo UN-OCHA taariikhdu markay ahayd 13’kii Luulyo 2019

In bixinta gargaarka sal looga dhigo shuruucda afarta ah ee jiheeya gargaarka Bani’aadanimo kuwaas oo kala ah: Bani’aadanimo, Daacadnimo, Dhexdhexaadnimo iyo Madax banaani.

Madashu waxay isku raacday in Madasha xigta lagu qabto magaalada Dhuusomareeb ee caasimada maamul Goboleedka Galmudug 22’ka Oktoobar 2019.

Wasiirka Wasaaradda Gargaarka iyo Maareynta Musiibooyinka Xukuumadda Federaalka Soomaaliya ayaa ugu baaqay hey’adaha ka shaqeeya gargaarka in ay sida ugu dhaqsiyaha badan la gaaraan dadka ay saameeyeen fatahaadaha iyo daadadka ka dhashay deegaannada qaar ee ka mid ah degmooyinka Dalka.

Mundane Xamsa Saciid Xamsa Wasiirka Gargaarka ayaa sheegay in la joogo waqtigii uu muuqan lahaa doorka hey’adaha gargaarka ku leeyihiin bad baadinta nolosha dadka.

Shir jaraa’id oo uu manta Wasiirka ku qabtay xafiiskiisa ayuu ku faahfaahiyay xaaladaha fatahaadda ee saameeyay deegaannada qaar ee dalka

Wasiirka waxa uu ka hadlay saameynta gaar ahaan roobabkan ku yeesheen degmooyinka Afgooye iyo Balcad oo ka wada tirsan goballada Shabeellaha Dhexe iyo Shabeellada Hoose.

“Roobka xilliga xagaaga oo aad u batay, si gaar ahna ugu badan Koofurta dalka ayaa sababay in ay butaacaan ama fatahaan, qeybo badan oo ka mid ah dalka. Waxaa taasi ay sababtay in ay timaado xaalad baahi bani aadanimo iyo barakac baahsan oo ay sameeyeen dadka ku nool meelaha ay halista ka dhacday. Goballada saameynta ugu badan gaadhay Waxaa kamid ah shebeellada hoose, shabeellada dhexe. Banadir iyo Meelo ka mid ah Jubbooyinka”. Ayuu yiri Xamsa Saciid Xamsa, Wasiirka Wasaaradda Gargaarka iyo Maareynta Musiibooyinka.

Wasiirka oo hadalkiisa sii wata ayaa ugu baaqay hey’adaha ka shaqeeya gargaarka in ay sida ugu dhaqsiyahabadan uga jawaabaan xaaladdan soo cusboonaatay

Waxa uu tilmaamay in dadka barakacay ay qabaan baahiyo kala duwan ee isugu jira dhinaca cuntada, Hooyga.

“Mar haddii ay xaaladda sidaas tahay, waxaa hey’adaha gargaarka ee dalka ka howlgala u farayaa in ay si deg deg ah ay gargaar ula gaaraan meelaha dhibaatada ka dhacday sida Afgooye iyo Balcad, dadka barakacay waxey qabaan baahiyaha asaasiga ah sida cunto, hooy iyo dawo, Wasaarad ahaan waan diyaarsannahay sidoo kale Ayaan ka codsanaynaa hey’adaha in si for fircoon shaqadooda gargaarka ah u gutaan”. Ayuu hadalkiisa ku daray Mudane Xamsa Saciid Xamsa,

Dhinaca kale Wasiirka Wasaaradda Gargaarka iyo Maareynta Musiibooyinka Xukuumadda Federaalka Soomaaliya waxa uu ka hadlay hails cusub oo ku soo biirtay diiwaanka musiibooyinka ka dhaca Soomaaliya

Mudane Xamsa Saciid Xamsa waxa uu sheegay in dabeylaha oo ku cusub Soomaaliya ay u muuqdaan kuwa isa soo taraya, isagoo si gaar ahna bulshada kalluumeysatada ah uga codsaday in ay ka feejignaadaan dabeylaha xagaaga ee into badan xilliyada oo kale ka dhaca xeebaha dalka.

Wasaaradda Gargaarka iyo Maareynta Musiibooyinka ayaa ah Wasaarad u xilsaaran ka hortaga, yareynta iyo Maareynta Musiibooyinka, Waxaana Wasaaraddu wadaa howlo baaxad leh oo looga gol leeyahay wax ka qabashada halisyada dalka ka dhaca.

Wasiirka oo ka qeybgalay shir gaar ah oo uu guddoomiyay sii hayaha ra’isal wasaaraha dalka ayaa hoosta ka xarriiqay in iyadoo laga jawaabayo baahiyaha jira hadana ay qasab tahay in xoogga la saaro in la sameeyo hab-dhismeedyada muhiimka ah ee ka qeybqaata maareynta iyo ka hortagga musiibooyinka

Wasiirka waxa uu sheegay in kulanka ka dhacay xafiiska sii hayaha uu ku soo aaday waqti muhiim ah marka la eego cabsiyada fatahaado ee ka jira meelo badan oo ka mid ah Soomaaliya

Md Xamsa Saciid Xamsa ayaa tilmaamay in wadashaqeyn dhaxmarta dhammaan hey’adaha Dowladda ay wax weyn ka tarayso wax ka qabashada xaaladaha uu dadka masuulka ka yahay iyo kuwa dabiiciga ahba.

“Musiibooyinka ayaa ka mid ah waxyaabaha sii xoojiya faqriga iyo caqabadaha ku hor-gudban horumar taabba gala oo ay bulshooyinka ay sameeyaan, qiyaasaha oo dhan waxey tusinayaan in qasaaraha naf iyo hanti oo ay musiibooyinka geystaan ay aad u badanyihiin.” Ayuu yiri Wasiirka Gargaarka iyo Maareynta Musiibooyinka DFS.

Wasiirka ayaa hadalkiisa ku daray in saameynta bulsho oo ay musiibooyinka geystaan gaar ahaanna ay ku yeeshaan dadka taagta daran ay sii murjineyso xaaladda nololeed ee dadkaas iyo sidi ay uga kori lahaayeen faqriga

Isagoo ka hadlayay kulanka saakay kadib, waxaa Wasiirka uu tilmaamay in loo baahanyahay shacab iyo dowladba loo howlgalo sidii loo diyaarin lahaa loona qaadi lahaa tallaabooyinka muhiimka ah ee looga hortagi karo halisyada ka hor inta aanay dhibaato gaarsiin dadka meel ay adagtahay in laga soo noqdo.

Wasiirka Gargaarka iyo Maareynta Musiibooyinka DFS waxa uu sheegay in ka wasaarad ahaan ay diyaariyeen qorshayaasha iyo siyaasado muhiim ah oo ay ka mid tahay siyaasadda qaran ee maareynta musiibooyinka oo muhiim ah maareynta iyo kahortagga halisyada dhaca.

Sidookale Wasiirka ayaa tilmaamay in Wasaaraddu sameysay kaabayaasha muhiimka ah ee loo adeegsado sii ogaashaha halisyada si looga jawaabo ka hor inta aanay musiibo isu badalin

Wasiirka waxa uu tilmaamay in wadashaqeynta hey’adaha xukuumadda ay ka mid tahay qodobada ka soo baxay kulan muhiim ah oo maanta ka dhacay xafiiska sii hayaha ra’isal wasaaraha Soomaaliya.

Ugu dambeyn Wasiirka ayaa carrabka ku xoojiyay in ka wasaarad ahaan xoojinayaan isu-duwista iyo qaban qaabinta dadaallada kala geddisan oo ay wadaan dhinacyo badan sida dowladda, hey’adaha UN-ta, ganacsatada iyo ururada aan dowliga ahayn ee ka shaqeeya gargaarka.